_from blog_:
_June_ 15, 2018
_by_ Anika
მკაცრი დიეტის დაცვა - საკვების გრამებით გაზომვა და დროის კონკრეტულ მონაკვეთში ზუსტი ულუფების მირთმევა ვისაც დიდ პრობლემას არ გიქმნით, მომილოცავს, თქვენ ნამდვილი გმირები ხართ. სამწუხაროდ, მე ამ ნაწილს არ მივეკუთვნები და ჩემ მსგავსად, ბევრი მეგობარი მყავს, ვისაც სიტყვა დიეტის გაგონებაზე თვალებში უბნელდება. ამ მოცემულობის მიუხედავად, დრო და დრო წონის დაკორექტირება ჩვენც გვესაჭიროება და ჯიუტი 2-3 კილოგრამის ჩამოკლება ჩვენთვისაც შეიძლება იქცეს დიდ გამოწვევად. დღევანდელ პოსტში დიეტოლოგების 3 მარტივ რჩევას შემოგთავაზებთ, რომლებიც ჩემ მსგავსად "დიეტის ნებისყოფის არმქონე" თუ თუნდაც დიდი გამძლეობის მქონე ადამიანებისთვის იდეალურია წონის კორექციისა და რამდენიმე ზედმეტი კილოგრამის დასაკლებად.
1. ყოველ საკვების მიღებაზე მიირთვით ცილის და უჯრედისის შემცველი პროდუქტი/პროდუქტები. ცილების და უჯრედისის ყოველ ჯერზე მიღებისას, ორგანიზმი დიდი ხნით ნაყრდება, მეტაბოლიზმი ჩქარდება, რის შედეგადაც მცირდება მოგვიანებით, საღამოსკენ არაჯანსაღი ან ჭარბი ოდენობით საკვების მიღების შანსები. უჯრედისი ორგანიზმის მიერ შაქრის მოხმარებას ანელებს, რის შედეგადაც ორგანიზმი გლუკოზას ენერგიის მისაღებად მოიხმარს და არ შეინახავს მას ცხიმის სახით.
2. დაიცავით საშუალოდ 4-საათიანი ინტერვალი ყოველ საკვების მიღებას შორის. თუ საუზმის შემდეგ 6-7 საათი ისე გაივლის, რომ თქვენ წახემსებასაც ვერ მოახერხებთ, მოგვიანებით ეს უარყოფითად აისახება თქვენს რაციონზე: დიდია ალბათობა, რომ ჭარბი ოდენობით საკვები მიიღოთ. ენდოკრინოლოგები აზუსტებენ, რომ ყოველ 4 საათში ერთხელ წახემსებით, მარტივად შევძლებთ სისხლში შაქრის დონის დარეგულირებას და უეცარი შიმშილის გრძნობის პრევენციას.
3. მიირთვით ცხიმები. ცხიმი არ ასუქებს! ჯანსაღი ცხიმი გაცილებით ეფექტიანად გვანაყრებს, ვიდრე რაფინირებული სახამებელი და კვლევების თანახმად, ასეთი ცხიმები დადებითად მოქმედებს ინსულინის დონეზე და მეორე ტიპის დიაბეტის ერთგვარი პრევენციაცაა.