4-კვირიანი მარტივი გეგმა სიარულისთვის ცნობილი ტრენერისგან

ფიზიკური აქტივობის გარეშე წონაში კლება, წარმოუდგენელი მგონია. უფრო სწორად, მკაცრი დიეტის რეჟიმში, წონაში კლება, რასაკვირველია, შესაძლებელია, თუმცა ეს არის იქნება ჯანსაღი კლება, რაც გონივრული კვების რეჟიმის და შესაბამისი ფიზიკური აქტივობის შედეგად მიიღწევა. ვარჯიშს, სირბილს დროის მობილიზაცია და სათანადოდ მომზადება სჭირდება, რაც მძიმე სამუშაო გრაფიკის პირობებში, საკმაოდ რთულია. გამოსავალი სიარულშია, გვარწმუნებს ცნობილი ამერიკელი ტრენერი ჰარლი პასტერნაკი. მისი აზრით, სისტემატური სიარული წონაში კლებისთვის საუკეთესო გადაწყვეტაა - შეეცადეთ იაროთ მეტი და კიდევ უფრო მეტი, გვეუბნება პასტერნაკი.

"სიარული შედარებით მარტივად შეგვიძლია დღის განრიგში ჩავსვათ", ამბობს პასტერნაკი, "სირბილის შემთხვევაში, სათანადოდ მომზადება გვესაჭიროება, საგანგებოდ უნდა ჩავიცვათ, დრო გამოვყოთ სირბილისთვის, სირბილის შემდეგ შხაპი მივიღოთ და გამოვიცვალოთ - ეს ყველაფერი კი, სიარულის შემთხვევაში, არ არის აუცილებელი". ამას გარდა, პირდაპირი კავშირი არსებობს ინტენსიურ კარდიოვარჯიშსა და შიმშილის გრძნობას შორის - რაც უფრო ინტენსიურად ვვარჯიშობთ, მით უფრო მეტად განვიცდით შიმშილის გრძნობას. ამიტომაც, თუ წონაში დაკლება გვსურს, სიარული საუკეთესო გადაწყვეტილებაა, აღნიშნავს პასტერნაკი.

პასტერნაკი 4-კვირიან გეგმას გვთავაზობს საიმისოდ, რომ სიარული წონაში კლების მიზნისთვის გამოვიყენოთ. გეგმის თანახმად, ჩვენი საშუალო ყოველდღიური ნაბიჯების რაოდენობა 4 კვირის თავზე 4,000 ნაბიჯით უნდა გავზარდოთ, რაც იმას გულისხმობს, რომ ერთ კვირაში 1,000 ნაბიჯით ვზრდით კვირის სტატიტისტიკას, რაც 4 კვირაში სასურველ შედეგს გვაძლევს. არ აქვს მნიშვნელობა, საშუალოდ რამდენ ნაბიჯს გადიხართ დღის განმავლობაში, ყოველკვირეული ზრდა არ უნდა შევაჩეროთ, სანამ დღიურად 14,000 ნაბიჯამდე არ ავალთ.