აერობული (კარდიო) ვარჯიშების უპირატესობები

აერობული ვარჯიშები ყოველთვის ითვლებოდა ფიზიკური აქტივობის ერთ-ერთ საუკეთესო ფორმად იმის გამო, რომ სხეულის სხვადასხვა ზონების გავარჯიშებასთან ერთად, ამ დროს დიდი ოდენობით კალორიებს ვწვავთ, რაც წონაში კლებაში და ცხიმების წვაში გვეხმარება. დღევანდელ პოსტში, ფიტნესის სპეციალისტების და ექიმების მოსაზრებებს გაგაცნობთ იმასთან დაკავშირებით, თუ რა კონკრეტული სარგებელი მოაქვს აერობულ, იგივე კარდიო ვარჯიშებს - მაგ, სირბილი, ველოსიპედი.

1. მეტი ენერგია ზოგადად და მეტი ენერგია კუნთებს. ამას თავისი ახსნა აქვს: აერობული ვარჯიშები კუნთების უჯრედებში მიტოქონდრიის გაზრდილ რაოდენობას ნიშნავს - მიტოქონდრია ერთგვარი ენერგიის წყარო და ცენტრია უჯრედისთვის. ამიტომაც, მეტი ოდენობის მიტოქონდრია შესაბამისად ორგანიზმის სხვადასხვა ფუნქციების მხარდასაჭერად მეტ ენერგიას გულისხმობს. საბოლოო ჯამში, გაზრდილი ოდენობის ენერგია კუნთებისთვის ფრიად სასიკეთო რამაა ჩვენი ორგანიზმისთვის. ამას გარდა, ხანგრძლივი აერობული ვარჯიშების დროს კუნთებში ისეთი ტიპის ქსოვილები წარმოიქმნება, რომლებიც შედარებით ადვილად უძლებენ დაღლილობას და მეტი მიტოქონდრია გააჩნიათ. ბევრი მიტოქონდრია კი ბევრს ენერგიას ნიშნავს, როგორც ზემოთ აღვნიშნე.

2. გაზრდილი გამძლეობა. აერობული ვარჯიშების დროს სისხლძარღვებში ზრდა ხდება, რის შედეგადაც მეტი ჟანგბადის მიწოდება ხდება მიტოქონდრიისთვიის, რომელიც ენერგიის ერთ-ერთი უმთავრესი წყაროა. შედეგად, მეტი გამძლეობით მეტი ფიზიკური დატვირთვის ატანა შეგვეძლება, მეტ კალორიებს დავწვავთ და წონაში კლებაც უფრო სწრაფად წავა.

3. ცხიმების გაძლიერებული წვა. მომატებული მიტოქონდრია, როგორც აღვნიშნეთ, კუნთებს ეხმარება, ცხიმების მარაგი უფრო ეფექტიანად გამოიყენონ ენერგიის წყაროდ - ამას ცხიმ-მჟავების ოქსიდაციას უწოდებენ. ამდენად, გაზრდილი გამძლეობის გარდა, კარდიო-ვარჯიშების შედეგად მეტი ოდენობის მზა ჟანგბადს  და უფრო ძლიერ კუნთებს ვიღებთ, რაც თავის მხრივ, მეტ ცხიმს გვაწვევინებს და წონაშიც უფრო მარტივად გვაკლებინებს.

მომდევნო პოტამდე,

ანიკა