ძილის წინმსწრები მავნე ჩვევების შესახებ

ბოლო ხანებში ძილი შემიყვარდა. უფრო სწორად, დავაფასე. არ ვიცი, რას დავაბრალო - იმას, რომ უკანასკნელი წლების განმავლობაში მუდმივად ძილის ნაკლებობას ვუჩიოდი, თუ იმ ინფორმაციას, რაც ძილის მნიშვნელობის და მისი ნაკლებობის ეფექტების შესახებ ამოვიკითხე რამდენიმე სარწმუნო კვლევაში. ერთი რამ ფაქტია - აგერ უკვე ორი კვირაა, ვცდილობ “რვა საათიანი ღამის ძილის” ოქროს წესის დაცვას და იმ რჩევებსაც შეძლებისდაგვარად ვითვალისწინებ, რასაც ამ სფეროს ექსპერტები “ნაყოფიერად” გამოძინების მიზნებისთვის გვირჩევენ.

ეს რჩევები პირდაპირ მიგვითითებს იმ მავნე/არაჯანსაღ ჩვევებზე, რომლებიც ჩაძინების თუ გამოძინების შესაძლებლობას გვართმევენ, ეს ყველაფერი კი, საბოლოო ჯამში, ჯანმრთელობის ზოგადი მდგომარეობის გარდა, პირდაპირპროპორციულად აისახება კანის მდგომარეობაზეც: ამოშავებული და შეშუპებული თვალის უპეები, გაცრეცილი კანის ფერი, კანის არათანაბარი ზედაპირი - მოკლედ, კარგი არაფერი.

ამიტომაც, გადავწყვიტე, თქვენც გაგიზიაროთ ამ სფეროს ექპსერტების რამდენიმე სასარგებლო რეკომენდაცია, რომლებიც ჯანმრთელი ძილის რეჟიმს ეხება.

1 - ძილის წინ ტელევიზორის ყურება - კვლევების თანახმად, ტელევიზორის ეკრანის განათება გონებას მაცდუნებელ სიგნალებს უგზავნის იმის შესახებ, რომ ძილის დრო ჯერ არ დამდგარა და ქვეცნობიერად გაიძულებთ, კიდევ ხანგრძლივად ვერ მოწყდეთ ეკრანს, რაც ავტომატურად გიმცირებთ გაღვიძებამდე დარჩენილი საათების რაოდენობას;

2 - ტელეფონზე ხანგრძლივი საუბარი - ერთი შეხედვით სრულიად უდანაშაულო საუბარმა მეგობართან, შეიძლება სერიოზულად გაანელოს ჩაძინების პროცესი. უკანაკნელი პერიოდის კვლევებმა აჩვენეს, რომ ასეთი სატელეფონო საუბრები პირდაპირ არის კავშირში ღრმა ძილის შესალებლობასთან, რაც ძილის სხვადასხვა ფაზებს შორის, ყველაზე მნიშვნელოვანი ფაზაა.

3 - ოთახის ტემპერატურა - სატელეფონო საუბრის გარდა, ღრმა ძილის ფაზაში გადასვლას ზედმეტად “ჩათბუნებული” გარემოც უშლის ხელს: შეეცადეთ, ოთახში ტემპერატურა 20 გრადუსს არ აღემატებოდეს.

4 - ციცინათელები - მელატონინის (ჰორმონი, რომელიც ჩაძინების და ძილის პროცესს არეგულირებს) სათანადო რაოდენობით გამომუშავებისთვის ერთ-ერთი ხელისშემშლელი ფაქტორი საძინებელში განთავსებული ელექტრო საათების, მობილური ტელეფონების, ლეპტოპის თუ სხვა ელექტრო მოწყობილობის მოციმციმე სინათლეებია.

5 - კოფეინის მიღება - ექიმები მკაცრ რეკომენდაციას იძლევიან იმასთან დაკავშირებით, რომ დაძინებამდე 8 საათის განმავლობაში არ არის სასურველი კოფეინის შემცველი სასმელების მიღება. ასე, რომ ვინც ჩემს მსგავსად 23.00 საათისთვის იძინებთ, გირჩევთ, დღის 3.00 საათის შემდეგ უკოფენო ყავა და ჩაი დააგემოვნოთ.

6 - უარი სიგარეტს - კიდევ ერთი საინტერესო კვლევის შედეგების თანახმად, სიგარეტის მწეველებში თავის ტვინის გაცილებით მაღალი აქტივობა ფიქსირდება, ვიდრე არამწეველებში, რაც მათ ჯანსაღ ძილში უშლით ხელს. ამიტომაც ურჩევენ მწეველთა კატეგორიას, რომ დაძინებამდე 4 საათით ადრე დაასრულონ დღის “ნიკოტინური აქტივობები”.

7 - ალკოჰოლი - მეც მაქვს გამოცდილი 1-2 ჭიქა წითელი ღვინის ეფექტი ძილის წინ: ჩაძინებით ძალიან მარტივად იძინებთ, მაგრამ რამდენიმე საათის შემდეგ (დაახლოებით 3-4), როცა სისხლი ალკოჰოლისგან გამოთავისუფლდება, გეღვიძებათ და თავს “ძალიან ფხიზლად” გრძნობთ. თუმცა, ესეც ინდივიდუალურია, ალბათ და ბევრისთვის ძილის წინ ერთი ჭიქა წითელი ღვინო, უბრალოდ ცხოვრების წესია, ყოველგვარი ძილის რეჟიმის დარღვევის გარეშე.

იმედი მაქვს, ამ რჩევებიდან ერთი-ორის გამოყენებას მაინც შეძლებთ. შედეგების შესახებ შეგიძლიათ ანიკას ბლოგის სივრცეში გაგვიზიაროთ!

დროებით, მომდევნო პოსტამდე!

Mergens, that distinguished essay writing between curriculum-related clubs and others.