ერთი მარტივი მოძრაობა მუცლის ქვედა ნაწილის გასამკვრივებლად

მოდუნებული მუცლის ზონის პრობლემა ბევრ ჩვენგანს აწუხებს, სავარაუდოდ. პირადად ჩემთვის, მუცლის ქვედა ზონის გამკვრივება ყველაზე რთული და შრომატევადი პროცესი იყო: მხრები, მკლავები, ფეხები - სხეულის ნებისმიერ ზონას გაცილებით მარტივად გაუმკლავდები მუცლის ქვედა ნახევრის გამოკლებით. ის განსაკუთრებულ ძალისხმევას მოითხოვს და მუდმივი და სისტემატური მუშაობა ესაჭიროება. თანაც, ხომ გახსოვთ, რაც უფრო მეტი კუნთის მასა გვაქვს, მით უფრო კარგად მუშაობს მეტაბოლიზმი და მით უფრო მეტ ცხიმს წვავს ორგანიზმი. ამიტომაც, მკვრივი და ლამაზი მუცლის მიღების გარდა, პრესის სავარჯიშოები ზოგადად ნივთიერებათა ცვლის პროცესსაც დაეხმარება.

მუცლის პრესისთვის უამრავი სახის სავარჯიშო არსებობს, თუმცა როცა დრო ბევრი არ გვაქვს და მაქსიმალური ეფექტის მიღება გვსურს, ასეთ შეთხვევაში მაქსიმალურად ეფექტიანი ვარჯიში უნდა შევარჩიოთ. ასეთ ვარჯიშად ცნობილი ფიტნეს ინსტრუქტორი ანა რენდერერი ერთ მარტივ მოძრაობას გვთავაზობს, რომლის შესრულებაც სახლის პირობებში ყოველდღიურად შეგვიძლია და ის სულ რამდენიმე წუთს წაგვართმევს.

ეს სავარჯიშო რომ სუპერეფექტიანი და გამორჩეულია მუცლის პრესის ვარჯიშებში, ამაში ანას სხვა ბევრი ფიტნეს ინსტრუქტორიც დაეთანხმება, ალბათ, ვინაიდან ამ მოძრაობის შესრულებისას, მუცლის ქვედა ნაწილთან ერთად ვავარჯიშებთ ასევე გვერდებსაც, ზურგის ქვედა ნაწილს და ბარძაყის ფლექსორებს (მომკეცავ კუნთებს).

როგორ ვასრულებთ სავარჯიშოს? ვწვებით ზურგზე, ხელებს განზე ვშლით ისე, რომ ხელის გულები იატაკზეა დადებული. ფეხებს ვხრით მუხლებში, ვაწყობთ იატაკზე. ავწევთ ფეხებს გულ-მკერდის მიმართულებით და ვჩერდებით 90 გრადუსზე. მუცელი არ უნდა გვქონდეს მოდუნებული. მუხლებსმარჯვენა მხარეს გადავწევთ ისე, რომ იატაკამდე სულ რამდენიმე სანტიმეტრი რჩებოდეს - არ ვეხებით იატაკს, თორემ ეს კუნთების შეკუმშვას შეამცირებს.