გვინეთ პელთროუს და ვიქტორია ბექჰემის საყვარელი ვარჯიშები

არ აქვს მნიშვნელობა, პლანეტის რომელ ნაწილში დაიბადე, რა ფერის კანი გაქვს და რა თანხა გიდევს საბანკო ანგარიშზე - მოვლა ნებისმიერი ქალის სხეულს ესაჭიროება. ბუნებრივია, ვისაც ფინანსურად მეტი შესაძლებლობა აქვს, მათ შესაბამისად ალტერნატივებიც მეტი აქვთ სხეულის ფორმაში მოსაყვანად. თუმცა, ძალისხმევა ნებისმიერ ჩვენგანს ესაჭიროება, განსაკუთრებით როცა 35 წლის ასაკს გადავცდებით და ორგანიზმის ნივთიერებათა ცვლაც შესაბამისად ნელდება.

დღევანდელ პოსტში ცნობილი ამერიკელი ფიტნეს ინსტრუქტორის, ტრეისი ანდერსონის რამდენიმე ვარჯიშს გაგიზიარებთ, რომელთაც ინტენსიურად იყენებენ ანდერსონის ისეთ ცნობილი კლიენტები, როგორიც არიან ვიქტორია ბექჰემი და გვინეთ პელთროუ.

1. პლანკა ფეხის მოქნევით და მუხლში მოხრით. ვდგებით პლანკის პოზიციაში, მარჯვენა ფეხი უკან განზეა გადგმული, მარცხენა ფეხი მუხლი მოხრილი და იატაკზე დაყდნობილი. ვიღებთ მარცხენა ფეხს და მარჯვენა ფეხის ქვედა მიმართულებით ვაქნევთ და ვბრუნდებით ისევ საწყის პოზიციაში და მარჯვენა ფეხს გულ-მკერდის მიმართლებით ოდნავ მოვხრით ისე, რომ ცოტათი გაცდეს მარცხენა ფეხს. ისევ ვბრუნდებით საწყის პოზიციაში და ვიმეორებთ. ეს ვარჯიში იდეალურია მთლიანი მუცლის ზონის გასავარჯიშებლად.

2. იატაკზე ვდგებით და ვეყრდნობით ხელებით და მუხლებით იატაკს. ვხრით იდაყვებს 90 გრადუსით და მარჯვენა ფეხს უკან გადავაჯვარედინებთ დიაგონალურად. აზიდვების პრინციპით ვეყრდნობით მარცხენა ხელს და იმავდროულად უკან ვწევთ მარჯვენა ფეხს - მარჯვენა ხელი ზემოთ გვაქვს აწეული და გასწორებული. ვბრუნდებით საწყის პოზიციაში და ვიმეორებთ. ეს ვარჯიში იდეალურია ფეხების, განსაკუთრებით კი თეზოების ზონისთვის.

3. ფეხებს მუხლებში ვხრით ისე, რომ მარჯვენა ფეხი მარცხენა უკან იყოს. მარჯვენა ხელს წელზე ვიდებთ დოინჯის სახით, მარცხენა ხელით კი იატაკს ვეყრდნობით. მარჯვენა ხელს ზემოთ ვწევთ და პარალელურად მარჯვენა ფეხს ავიქნევთ ზედა მიმართულებით განზე. ვბრუნდებით საწყის პოზიციაში და ვიმეორებთ. ეს ვარჯიში ხელს უწყობს წელის და დუნდულების გამკვრივებას.

4. იატაკზე ვდგებით მუხლებზე და ხელებით ვეყრდნობით იატაკს. მარცხენა ფეხს ვწევთ მაღლა, მუხლი მოხრილი გვაქვს. მარცხენა მუხლს მარცხენა მხრის მიმართულებით მოვიზიდავთ, გავშლით ფეხს უკან, ხელებს იატაკიდან ვიღებთ, მარჯვენა ხელს წინ ვიშვერთ ზედა მიმართულებით, მარცხენა იდაყვს კი უკან ვხრით. ვბრუნდებით საწყის პოზიციაში და ვიმეორებთ.