HIIT ვარჯიშის თავისებურებები და უპირატესობა

მაღალი ინტენსივობის ინტერვალური ვარჯიში ფიტნესის ინდუსტრიის ერთ-ერთი წამყვანი ტრენდია აგერ უკვე რამდენიმე წელიწადია. ტრენდი ყოველთვის დროსთან და მოდურობის ტალღასთან არის დაკავშირებული, თუმცა HIIT ვარჯიშს რაც შეეხება, შეიძლება თამამად ითქვას, რომ მისი ეფექტურობა და ფანტასტიური შედეგები სტაბილური, მდგრადია და ცვალებადობას არ ექვემდებარება.

რეალურად, HIIT იდეალურია კალორიების დასაწვავად და თქვენი ფიზიკური მომზადების დონის გასაძლიერებად. HIIT ვარჯიშები გათვლილია იმაზე, რომ დროის ლიმიტირებულ, მოკლე პერიოდში მოხდეს თქვენი სხხეულის მაქსიმალურ სტრესამდე მიყვანა ისე, რომ ორგანიზმმა ეს ინტენსივობა კიდევ უფრო მეტი კალორიების დასაწვავად გამოიყენოს და იმავდროულად შეძლოს ფიზიკურ სირთულეებთან გამკლავება. ამ პროცესში გადამწყვეტ როლს არა ვარჯიშის ინტენსივობის დონე, არამედ აღდგენის პროცესი თამაშობს. თუ თქვენ შეეცდებით ეს მაქსიმალური ინტენსივობა მთელი ვარჯიშის განმავლობაში შეინარჩუნოთ, ასე ორგანიზმი გადაიწვება ზედმეტად დიდი გამოწვევის გამო. ამ დროს შესაძლოა სხეულის რომელიმე ნაწილმა ზიანიც კი განიცადოს, ან სულ მცირე კალორიების წვის პროცესი შენელდეს იმის გამო, რომ სტრესის ჰორმონის ჭარბი გამოყოფა და ორგანიზმში საპასუხოდ ანთებით პროცესის პროვოცირება მოხდება.

ამიტომაც, HIIT ვარჯიშის მიმდინარეობისას, მაღალი ინტენსივობის დატვირთვის მონაკეთებში საკუთარი ორგანიზმი უნდა ვაიძულოთ, გულისცემის მაქსიმუმამდე, 100%-მდე ავიდეს და შემდეგ უკვე, დაბალი ინტენსივობის მონაკვეთში მოახდინოს აღდგენა გულისცემის მაქსიმუმის 60-70%-ის ფარგლებში. ეს ინტენსიური ინტერვალები საშუალოდ 20 წამიდან 2 წუთამდე გრძლედება ხოლმე, გააჩნია თქვენს ფიზიკურ მომზადებას. თქვენი გულისცემის მაქსიმუმის დაანგარიშება კი მარტივად არის შესაძლებელი: 220-ს უნდა გამოაკლოთ თქვენი ასაკი და მიღებული ციფრი არის გულისცემის მაქსიმუმი.