ჯანმრთელი საუზმის პრინციპები

საუზმე რომ დღის ყველაზე მნიშვნელოვანი კვების დროა, ამაზე ადრეც გვისაუბრია და მგონი იმ საკითხზეც შევთანხმდით, რომ არავითარ შემთხვევაში, არასდროს არ გამოვტოვოთ საუზმე. მოკლედ, დილით საუზმის მირთმევა საბოლოო გადაწყვეტილებაა და გასაჩივრებას არ ექვემდებარება.

დღევანდელ პოსტში ექსპერტების რამდენიმე სასარგებლო რჩევას გაგიზიარებთ ჯანმრთელი საუზმის ჩვევის ჩამოყალიბებასთან დაკავშირებით. საუზმისთვის იდეალურ დროდ 7-8 საათის მონაკვეთი ითვლება, მაგრამ, თუ დილით ადრიანად ადგომის ფან-კლუბის წევრი არ ხართ, შეეცადეთ საუზმე 9-10 საათს მაინც არ გადააცილოთ.

აქტიური ცხოვრების წესის მიმდევრებს, საუზმემდე იოგას ან პილატესის ხანმოკლე სესიითაც შეგიძლიათ დაკავდეთ და უკვე მას შემდეგ შეუდგეთ საუზმეს.



იდეალურ შემთხვევაში საუზმე ცილების, ნახშირწყლების და უჯრედისის შემცველ საკვებს უნდა მოიცავდეს. ჯანსაღი საუზმისთვის საუკეთესო არჩევანი შემდეგი ტიპის პროდუქტები:

• ხილი და ბოსტნეული (ახლადგამოწურული ხილის ან ბოსტნეულის წვენი, ხილის სალათი იოგურტთან ან მაწონთან ერთად);


• მარცვლეული: შვრიის, წიწიბურას, ქერის, ქატოს ან რომელიმე სხვა ფაფა (მე შვრია-წიწიბურას თაყვანისმცემელი ვარ); თუ ფაფების მოყვარული არ ხართ, მაშინ შეგიძლიათ გახუხული პურის სენდვიჩი მოამზადოთ ან საერთოდაც მიუსლიზე შეაჩეროთ არჩევანი. მიუსლის შემთხვევაში, ძალიან კარგი იქნება თუ ისეთს შეიძენთ, რომელიც ჩირებს შეიცავს დამატებით ან სულაც თავად შეგიძლიათ დაუმატოთ თუ სახლში მოგეპოვებათ გარგარის, ქლიავის ჩირის, ქიშმიში ან ნებისმიერი სხვა თქვენთვის საყვარელი ჩირის სახეობა.


• რძის პროდუქტები: რძე, იოგურტი, ხაჭო, კეფირი. გარკვეული პერიოდის განმავლობაში, ძირითადად ხილის იოგურტების მომხმარებელი ვიყავი, მაგრამ, ბოლო თვეების განმავლობაში მაწონი-ხაჭოს კომბინაცია ყოველგვარ იოგურტს მირჩევნია და მგონია, რომ ნაკლებ კალორიულიც უნდა იყოს. ცოცხალი ხილი, ხილის ჯემი ან თაფლი შეგიძლიათ საკუთარი გემოვნებით დაამატოთ და ნოყიერ და ჯანმრთელ ულუფას მიიღებთ.


• და ბოლოს, არ დაგავიწყდეთ ისეთი ცილოვანი პროდუქტები, როგორიც ყველი და კვერცხია. ცილებს, სხვა დანარჩენთან ერთად, ერთი დიდი უპირატესობა აქვთ: ისინი მეტ ენერგიას გვაძლევენ, რის ხარჯზეც შიმშილის გრძნობა ნახშირწყლებთან შედარებით უფრო გვიან მოდის. ასე, რომ გვიანი ლანჩის შემთხვევაში ცილოვანი საუზმე კარგი არჩევანია.

მომდევნო პოსტამდე,

ანიკა