მავნებელია თუ არა დილით აერობული (კარდიო) ვარჯიში

დილით, უზმოდ ვარჯიში, ყოველთვის მიჭირდა - უფრო სწორად, არასდროს გამომდიოდა, ამიტომაც, მალევე გავეშვი და ჩემთვის ყველაზე მისაღებ და კომფორტულ დროს, საღამოსკენ გადავიტანე. თუმცა, დილაადრიან აერობული - ე.წ. კარდიოვარჯიშების - კეთებას მომხრეების და მიმდევრების დიდი არმია ყავს, რომელთაც მიაჩნიათ, რომ ეს წონაში კლებისთვის სრული მისწრებაა. მათ პოზიციას შესაბამისი ახსნაც აქვს, როგორც ექიმები ამბობენ: დილით სისხლში გლიკოგენის მარაგი ამოწურულია - გლიკოგენისგან ორგანიზმი ენერგიას იღებს. ამიტომაც, ჩვენი ორგანიზმი ცხიმის დაწვას იწყებს და ამგვარად ცდილობს მისგან გლიკოგენის მიღებას.

ამ მოსაზრების მოწინააღმდეგეები კი ამტკიცებენ, რომ უზმოდ ვარჯიში უარყოფითად მოქმედებს გულის მდგომარეობაზე.

სადღაც შუაში სიმართლის ძიება რთული საქმეა. გამოცდილ ტრენერს თუ დავუჯერებთ, დილით უზმოდ სირბილი მისთვის იდეალური ვარჯიშია, წონის რეგულირებაშიც კარგად ეხმარება, თუმცა გარბენამდე ის აუცილებლად იღებს ამინომჟავებს. ყველაზე ოპტიმალურ ხანგრძლივობად კი 30-40 წუთს გვირჩევს - ამაზე მეტი უკვე ზედმეტი დატვირთვა იქნება ორგანიზმისთვის. ამას გარდა, რეკომენდებულია სირბილის შემდეგ მსუბუქი საუზმე, რათა ხელი შევუწყოთ ნივთიერებათა ცვლას და არ გავართულოთ კატაბოლიზმის - ნივთიერებათა დაშლის - პროცესი. ძილის შემდეგ კატაბოლიზმი ისედაც გაძლიერებული ორგანიზმში, აერობული ვარჯიშის შემდეგ კი კიდევ უფრო ძლიერდება. ამიტომაც, თუ ვარჯიშის შემდეგ რამდენიმე საათი საკვებს არ მიიღებთ, ასე ამ პროცესს მეტად დაამძიმებთ. მართალია, კატაბოლიზმის დროს ცხიმების წვა ხდება, მაგრამ ეს ყველაფერი საკუთარი კუნთოვანი მასის დაზიანების ხარჯზე არ უნდა მოხდეს: ცხიმის წვასთან ერთად კუნთოვანი ქსოვილების დაშლაც ხდება. ამიტომც, იდეალური ვარიანტია დილის სირბილის შემდეგ ცილოვანი საუზმის მიღება, ასე ცხიმების წვაც უფრო გახანგრძლივდება. ფიტნეს ინსტრუქტორები 3 კვერცხის ცილისგან მომზადებული ომლეტის მირთმევას უწევენ ყველაზე დიდი რეკომენდაციას, შეგიძლიათ ცოტა კიტრი მიაყოლოთ. ამას გარდა, ცოტა შვრიის ფაფის მირთმევაც არ არის ცუდი აზრი.

წარმატებებს გისურვებთ!

ანიკა