მივირთვათ თუ არა ხაჭო ძილის წინ?!

წონაში დაკლების მსურველების დიდ ნაწილს მიაჩნია, რომ დიეტაზე ყოფნის პერიოდის აუცილებელი კომპონენტი საღამოს საათებში შიმშილია: 6 საათის შემდეგ არ ვჭამ; ძილის წინ მხოლოდ ჩაი ან წყალი - რამდენჯერ გსმენიათ მსგავსი რამ. ფიტნესის ექსპერტებს თუ დავეკითხებით, ძილის წინ საკვების მიღება წონაში კლებას არ აფერხებს, მთავარია საკვები იყოს სწორად შერჩეული. ვაშა, გადავრჩით, შიმშილით გაბრუება აღარ მოგვიწევს! თუმცა, რომელია "სწორად შერჩეული" საკვები? ხილი? ბოსტნეული? რძის პროდუქტები? მოდით, გავარკვიოთ.

როგორც ფიტნესის სპეციალისტები ირწუნებიან, ძილის წინა პერიოდში შესაძლებელია ცილოვანი პროდუქტების მიღება: თევზი, ქათამი, კვერცხი. ნახშირწყლებს რაც შეეხება, მათ შესახებ საღამოს საათებში სჯობს დავივიწყოთ. ძილის წინ მირთმეული ნახშირწყლები ყველაზე კარგი სცენარით, ჩვენს გვერდებში მაინც მოიყრის თავს ზედმეტი ცხიმის სახით. შიმშილი ძალიან თუ შეგაწუხებთ, შესაძლებელია ასევე ცოტა ოდენობით წიწიბურას მირთმევა - დაახლოებით 50 გრამი. თუმცა, იდეალურ ვარიანტში საღამოს კვერცხის ცილისგან მომზადებული ომლეტის მირთმევაა რეკომენდებული, რომელსაც გარნირად ბროკოლი ან ისპანახი შეგვიძლია მივამატოთ.  ასეთ შემთხვევაში დილით კუჭში სიმძიმის შეგრძნება არ შეგაწუხებთ და მსუბუქად გაიღვიძებთ.

ერთი შეხედვით რთული არ უნდა იყოს: ცილებზე თუ ვსაუბრობთ, მაშინ წესით, ხაჭო და რძის პროდუქტებიც კარგი არჩევანი უნდა იყოს ძილის წინ. აქ საქმე ისე მარტივად არ არის, როგორც ჩვენ გვგონია. რა ქმნის პრობლემას? თეორიულ დონეზე თუ განვიხილავთ, ღამით ორგანიზმში აღმდგენითი პროცესები მიმდინარეობს, კერძოდ კი ჰორმონი სომატროპინი გამომუშავდება - ზრდის ჰორმონი. ის გავლენას ახდენს ცხიმოვა უჯრედებზე, ახდენს მათ მობილიზებას და ხელს უწყობს მათ დაშლას. ძილის წინ ხაჭოს მირთმევის შემთხვევაში, ინსულინის "გამოღვიძება" ხდება, რომელიც სომატროპინის მოქმედებას აფერხებს, შესაბამისად ხელს უშლის ცხიმების დაშლასაც. ასე, რომ ხაჭო აუცილებლად მიირთვით, მხოლოდ დღის პირველ ნახევარში.

მომდევნო პოსტამდე,

ანიკა