პილატესის ძირითადი წესები

უმოძრაო და პასიური ადამიანი 30 წლის ასაკში უკვე მოხუცებული, მოძრავი და ძლიერი 60 წლის ადამიანი კი ჯერ კიდევ ახალგაზრდაა”, ასე ამბობდა მსოფლიოში ყველაზე ფართოდ გავრცელებული და პოპულარული სპორტული ვარჯიშის შემქმნელი ჯოზეფ პილატესი. ჯერ კიდევ გასულ საუკუნეში შექმნილი ფიტნესის ეს მიმართულება, დღეისთვის არაერთი მოდელის, ცნობილი პოლიტიკოსის თუ წარმატებული პროფესიონალის ცხოვრების განუყოფელი ნაწილია. ვარჯიშის ამ სახეობას მილიონობით ადამიანი ჯანმრთელობის, კარგი განწყობის და უპირველეს ყოვლისა, სხეულის ლამაზი ფორმების მისაღწევად ირჩევს. ამ შედეგს კი ზუსტი და მკაცრად კონტროლირებადი ვარჯიშების სუნთქვასთან კოორდინირებით ახერხებენ. თუმცა, ზემოთ ჩამოთვლილის გარდა, პილატესი მის მიმდევრებს ბალანსის და კოორდინაციის გაუმჯობესებაში და სტრესის დაძლევაშიც ძალიან ეხმარება. და კიდევ ერთი კარგი მხარე რაც პილატესს გააჩნია იმაში მდგომარეობს, რომ მას ფაქტიურად არ გააჩნია უკუჩვენებები: ის ნებისმიერი ასაკის და მომზადების დონის მქონე ადამიანს შეეფერება.

მართალია, 1920-იან წლებში ჯოზეფ პილატესის მიერ მხოლოდ 34 საბაზისო ვარჯიში შეიქმნა, მაგრამ დღეისთვის პილატესის 500-ზე მეტ სხვადასხვა ვარჯიშს მოიცავს. ყველაზე მთავარი პრინციპი პილატესის მიმდევრებისთვის კი სწორი სუნთქვა, მუდმივი კონტროლი და ვარჯიშის სისტემატური ხასიათია.



სპეციალისტებს თუ დავეკითხებით, გავიგებთ, რომ პილატესის მთავარი უპირატესობა იმაში მდგომარეობს, რომ ფიტნესის სხვა სახეობებთან შედარებით, ის კუნთების იმ ტიპს ამუშავებს და ავარჯიშევს, რომლებიც ჩვენი სხეულისთვის ერთგვარი კორსეტის ფუნქციას ასრულებენ, ჩვენი ჩონჩხის და შიდა ორგანოების სიმყარეს უზრუნველყოფენ.

პილატესის ინსტრუქტორები ვარჯიშის დაწყების მსურველებთან ყოველთვის ხაზს უსვამენ იმ სამ ძირითად პრინციპს, რომელიც პილატესის მიმდევრებმა უნდა დაიცვან. პირველი პრინციპი ვარჯიშის რეგულარულ ხასიათში მდგომარეობს. თავიდანვე შეარჩიეთ ისეთი ჯგუფი, რომელიც თქვენი მომზადების დონეს შეესაბამება და ნელ-ნელა, დროთა განმავლობაში გაზარდეთ თქვენი დატვირთვა და სირთულე. რეკომენდირებული სიხშირე საწყის ეტაპზე კვირაში 2-3-ჯერ ვარჯიშია.

მეორე პრინციპის თანახმად, თავიდანვე უნდა შეეგუოთ იმ აზრს, რომ ვარჯიშის შედეგების დადგომას გარკვეული დრო სჭირდება. დაახლოებით 10 ვარჯიშის შემდეგ უკვე შეძლებთ სხვაობის დანახვას: კუნთები უფრო ელასტიური და ადვილად “მართვადი” გახდება, 20-30 ვარჯიშის შემდეგ კი ცვლილებებს გარშემომყოფებიც ადვილად შეამჩნევენ.

და მესამე ძირითადი წესი, რომელიც სავარჯიშოების ზედმიწევნით ზუსტ შესრულებას მოითხოვს. ამის განსახორციელებლად კი იდეალური გამოსავალი კარგი ინსტუქტორის შერჩევა იქნებოდა - ისეთი ინსტუქტორის, რომელიც თქვენი ინდივიდუალური მდგომარეობიდან და საჭიროებებიდან გამომდინარე შეგირჩევთ ვარჯიშებს და ზუსტ მითითებებს მოგცემთ მათ შესრულებასთან დაკავშირებით. არ დაგავიწყდეთ, რომ პილატესში კონტროლი უმთავრესი რამაა.

მომდევნო პოსტამდე,

ანიკა