რამდენიმე ძირეული ცვლილება ჯიუტი კილოგრამების დასაკლებად

ბოლო 3 თვეა რამდენიმე ჯიუტ კილოგრამს ვებრძვი - ხან სირბილით, ხან დიეტით, ხან ვარჯიშით, მაგრამ ჯერ-ჯერობით სამწუხაროდ, უშედეგოდ. ინტერნეტში ოპტიმალური ფიტნეს გამოსავლის ძიებაში ერთ საინტერესო სტატიას გადავაწყდი - უფრო სწორედ ბლოგ-პოსტს, სადაც ავტორი ანა ყვება, თუ რა მეთოდით დაამარცხა უძრავ მდგომარეობაში მყოფი ზემდეტი 7 კილოგრამი. ჰოდა, მეც გადავწყვიტე, ჩემ მსგავსად გასაჭირში მყოფებს გაგიზიაროთ.

ანას მეთოდი უპირველეს ყოვლისა ფიზიკურად აქტიურ ცხოვრებას გულისხმობს. როგორც თავად ამბობს, ადრე იოგათი იყო დაკავებული მხოლოდ - მართალია კვირაში 5-ჯერ, მაგრამ ეს ჭარბი წონის დაგდებაში მაინც ვერ დაეხმარა. მას შემდეგ რაც პერსონალური ფიტნეს ინსტრუქტორის დახმარებით, ძალოვანი ვარჯიშების და აერობული (კარდიო) ვარჯიშების კომბინაციას მიმართა, წონაც ნელ-ნელა დაიძრა. ანა კვირაში 2-3-ჯერ ძალოვანი ვარჯიშებით იყო დაკავებული, კვირაში 2-ჯერ კარდიოს აკეთებდა, ე.წ. "დასვენების დღეებში" კი იოგას ან პილატესს. ამას გარდა, კვირაში რამდენიმე დღე ფეხით დადიოდა.

მეორე მნიშვნელოვანი დეტალი ანას წარმატებულ მეთოდში ძალოვანი ვარჯიშებისას სავარჯიშო წონის მუდმივი ცვლილებაა, რაც მას ფიტნეს ინსტრუქტორმა ურჩია. შესაძლოა, თავიდან რთულად მოგეჩვენოთ, მაგრამ თუნდაც 500 გრამით ან ერთი კილოგრამით დატვირთვის გაზრდა, ხელშესახებ შედეგს იძლევა.

ფიზიკური აქტივობის გარდა, ანას საკვები რაციონის მნიშვნელოვანი გაკონტროლება დასჭირდა, რაც უპირველეს ყოვლისა, შაქრის მოხმარების მინიმუმამდე დაყვანას გულისხმობდა. როგორც თავად წერს, თავიდან საკმაოდ რთული აღმოჩნდა ეს ცვლილება, მაგრამ რამდენიმე დღეში შაქრის და ტკბილეულის ცდუნების გაძლება უკვე სულ უფრო მარტივი ხდებოდა.

ტკბილეულის გარდა, ანამ უარი თქვა ასევე ალკოჰოლზეც და საკვებ რაციონში უპირატესობა ცილებს და ჯანსაღ ცხიმებს მიანიჭა, ნახშირწყლები კი მინიმუმამდე დაიყვანა.