რკინით მდიდარი საკვების ხელსაყრელი კომბინაციები

ვეგეტარიანელებისთვის ან სულაც ხორცის მიმართ მწყრალად განწყობილი ადამიანებისთვის ვიტამინებისა და მინერალების მხრივ ერთ-ერთი ყველაზე პრობლემური საკითხი რკინის საკმარისი ოდენობით მიღებაა. მართალია, რკინა მცენარეულ საკვებშიც მოიპოვება, თუმცა, მისი ათვისება ორგანიზმის მიერ შედარებით პრობლემურია. მცენარეულ პროდუქტებში არსებული რკინის მხოლოდ 2-20%-მდე აღწევს რეალურად საჭმლის მომნელებელი სისტემიდან სისხლამდე, რაც ცხოველური საკვებიდან მიღებულ რკინასთან შედარებით საგრძნობლად მცირეა - 15-35% მდე ცხოველური პროდუქტების შემთხვევაში.

დიეტოლოგები ამ პრობლემის მარტივ გადაჭრას გვთავაზობენ: საკვებს C ვიტამინი დაუმატეთ - ასე თქვენი ორგანიზმი მცენარეული პროდუქტებიდან მიღებულ საკვებს თითქმის 6-ჯერ მეტად აითვისებს.  აქვე შემოგთავაზებთ ექიმების მიერ რეკომენდებულ საკვების იმ კომბინაციებს, სადაც რკინით მდიდარი მცენარული საკვები C ვიტამინით მდიდარ სხვა საკვებთანაა კომბინირებული.

1. ისპანახს (რკინა) + ბულგარული წიწაკა (C ვიტამინი) - ამ პროდუქტების კომბინირება საკმაოდ მარტივია: ისპანახით მომზადებულ სალათს მარტივად შეგვიძლია დავუმატოთ უმი, დაჭრილი ბულგარული წიწაკა ან ისპანახი დავამატოთ სატენით გამზადებულ ბულგარულ წიწაკას.

2. ბროკოლი (რკინა) + პომიდორი (C ვიტამინი) - ორთქლზე მომზადებული ბროკოლის ყვავილედი შეგვიძლია პომიდვრით მომზადებულ პასტას დავუმატოთ ან მარტივად ბროკოლი, პომიდორი, სოკო, ნიორი და შესაბამისი სანელებლები ზეითუნის ზეთში მოვშუშოთ.

3. მუქი შეფერილობის ლობიო (რკინა) + კომბოსტო (C ვიტამინი) - მოშუშულ კომბოსტოს მარტივად შეგვიძლია დავუმატოთ მოხარშული ლობიო.

4. ოსპი (რკინა) + ბრიუსელის კომბოსტო - მათი კომბინაციით ადვილად შეიძლება სალათის მომზადება: ოდნავ მოწალული ბრიუსელის კომბოსტო მოხარშულ და უკვე მომზადებულ ოსპს დავუმატოთ და სულ ესაა.

5. შავი შოკოლადი (რკინა) + მარწყვი (C ვიტამინი) - ეს ყველაზე გემრიელი და სანუკვარი კომბინაცია, თუ მარწყვი გიყვართ, რასაკვირველია. ჩემი საყვარელი ვარიანტი მარწყვზე მოხეხილი შავი შოკოლადია.

მომდევნო პოსტამდე,

ანიკა