როგორ დავირეგულიროთ ძილი

ბოლო პერიოდში ძილის პრობლემები მაქვს: ჩაძინება არ მიჭირს, მაგრამ შემდგომ, ღამის განმავლობაში პერიოდულად მეღვიძება, ნაწყვეტ-ნაწყვეტ მძინავს და დილით გამოუძიენებელი ვიღვიძებ. მსგავსი პრობლემა ვისაც გაქვთ ან გქონიათ, ალბათ, დამეთანხმებით, რომ რამდენიმე ასეთი ღამის შემდეგ, თავს უკვე ძალიან შეუძლოდ იგრძნობთ: თავის ტკივილი, თავბრუხვევა, კონცენტრაციის სირთულე. გასაკვირიც, არაა, ვინაიდან, ძილის ნაკლებობა, რეალურად, ძალიან ნეგატიურად მოქმედებს ჩვენს ტვინზე: ამ დროს სუსტდება ჩვენი კოგნიტური შესაძლებლობები, სხვების ემოციების გაგება, მატულობს სარისკო ქცევის შანსები, გვიმტკიცებენ ექიმები. გარდა ამისა, ცუდი ძილის შედეგად გვერღვევა კვები ჩვევები, მივირთმევთ უფრო მეტს, ვიდრე ჩვეულებრივ და ხელები არაჯანსაღი საკვებისკენ გაგვირბის. ამიტომაც, ხარისხიან ძილს ძალიან დიდი მნიშვნელობა აქვს ჩვენი ნორმალური ფუნქციონირებისათვის.

ინტერნეტში საინტერესო რჩევებს გადავაწყდი ამ საკითხთან დაკავშირებით და მინდა დღევანდელ პოსტში გაგიზიაროთ ის რამდენიმე რჩევა, რომელიც ჯანსაღ ძილში დაგვეხმარება.

მოკლედ, ე.წ. "ძილის ექსპერტების" თქმით, ერთ-ერთი მნიშვნელოვანი ფაქტორი ამ საქმეში, დღის განმავლობაში გარკვეული დროს დღის შუქზე გატარებაა. მათი თქმით, დღისით დღის შუქზე დროის გატარება, ღამით კი სიბნელეში ყოფნა ორგანიზმს ძილ-ღვიძილის ციკლის დარეგულირებაში ეხმარება. ყველაფერთან ერთად, ბუნებრივი დღის შუქი ძილის ჰორმონის მელატონინის დარეგულირებაში გვეხმარება. შეეცადეთ, სამსახურში შუადღის შესვენებით ირასგებლოთ და ცოტა ხნით, თუნდაც ნახევარი საათით ქუჩაში გაიაროთ.

ასევე, არანაკლებ მნიშვნელოვანია ის, თუ რას და როგორ მივირთმევთ საღამოს საათებში. მძიმე პროტეინები - რომელიც რთული მოსანელებელია და ხშირად, "გამოსაფხიზლებელი" ჰორმონის დოპამინის წინაპირობაა - ცხიმიან ან ცხარე საკვებთან ერთად საკმაოდ მძიმე იქნება ღამით გადასამუშავებლად. ამიტომაც, რეკომენდებულია ასეთი მძიმე საკვები და დიდი ულუფები დაძინებამდე საშუალო 3-4 საათით ადრე მივირთვათ.

კიდევ ერთი სასარგებლო რეკომენდაციაა, ძილის წინ პერიოდში თავი შევიკავოთ მაღალი დატვირთვის ვარჯიშებისგან. მართალია, ზოგადად, ვარჯიში კარგად მოქმედებს ძილის რეჟიმზე, თუმცა, ძილისწინა პერიოდში ინტენსიურმა ფიზიკურმა დატვირთვამ, შესაძლოა იმდენად ააჩქაროს მეტაბოლიზმი, რომ საბოლოოდ ამის შედეგად ძილის რეჟიმი აგვერიოს.

და ბოლო რჩევა, რომელიც ჩემ შემთხვევაში, საკმაოდ აქტუალური იყო: შეეცადეთ შუადღის შემდეგ აღარ მიიღოთ კოფეინის შემცველი სასმელი, პირველ რიგში, ყავა.