საზაფხულო არომატები

ზაფხულამდე ჯერ კიდევ ერთი თვეა დარჩენილი, თუმცა, მგონია, რომ სასიამოვნო პარფიუმერიაზე საუბარი - აი, ისეთზე, ზაფხულის ცხელ დღეებს შედარებით გრილს და ერთობ განსაკუთრებულს რომ გახდის - არასდროს არის ნაადრევი. დღეს რამდენიმე ასეთ სურნელს გაგაცნობთ:



Tom Ford, Neroli Portofino Aqua - სურნელის თაყვანისმცემლებს თუ დავუჯერებთ, ზაფხულის პერდიოში ამ არომატს თერმული წყლის ძალა აქვს: ავსებს ენერგიით,  მომენტალურად აცოცხლებს და მარტივად შეუძლია, ზღვისპირას ყოფნით გამოწვეული დადებითი მოგონებები თუ ემოციები გაგიღვიძოთ. ამ არომატში ზღვის წყლის და ტალღების სურნელთან ოსტატურად არის შეზავებული ციტრუსების ნოტები. ამ სურნელის ერთადერთ უარყოფით მხარედ მისი ნაკლებად მდგრადი ხასიათი მიიჩნევა: დილის მაკიაჟის შემდეგ სურნელის შეპკურებისას, იმის იმედად ნუ იქნებით, რომ არომატი საღამომდე გასტანს. ყოველი შემთხვევისთვის, ჩანთაში მაინც იქონიეთ.



Carrot Blossom & Fennel, Jo Malone - არ ვიცი, რა ასოციაციები შეიძლება გაგიჩნდეთ, როცა სუნამოს სახელწოდებაში სტაფილოს და კამას ამოიკითხავთ, მაგრამ ინტერნეტში არსებულ მიმოხილვებს თუ ვენდობით, ეს ძალიან გრილი სურნელია და არანაირად არ მოგაგონებთ თქვენი შვილის ბოსტნეულის პიურეს. მართალია სტაფილოსა და კამის ნოტები მასში ნამდვილად არის, თუმცა, ის იდეალურადაა დაბალანსებული გარგარის, მუშკისა და პაჩულის ნოტების რბილი ნაზავით.

ბოსტნეულთან მწყრალად მყოფებისთვის, მეორე ალტერნატივა Jo Malone-ისგან ოდეკოლონი Red Roses შეიძლება იყოს: ძალიან მარტივი, გრილი წითელი ვარდების არომატი. ოდნავ მოტკბო სურნელი აქვს, თუმცა ზაფხულის სიცხეებისთვის ზომიერად ყვავილოვანი და გაწონასწორებული არჩევანია.



Blue Santal, Commes des Garcons - ტომ ფორდის მსგავსად, ეს არომატიც ზღვის ტალღების და სანაპიროს სურნელს მოგაგონებთ. როგორც ამ ბრენდის ყველა სუნამო, არაბანალური და სხვებისგან განსხვავებულია, არ არის ზედმეტად მძაფრი, პირიქით უფრო სიმსიბუქისკენაა და საკმაოდ მდგრადია.

მომდევნო პოსტამდე,

ანიკა