შემოდგომის ერთ-ერთი გამორჩეულად სასარგებლო ბოსტნეული

შემოდგომის სეზონურ ხილ-ბოსტნეულს შორის ერთ-ერთი ჩემთვის გამორჩეულად საყვარელი ბოსტნეული ჭარხალია, რომელსაც სულ რამდენიმე წლის წინ დავუმეგობრდი. წლების განმავლობაში, ჭარხალთან ურთიერთობა "ბორშის" წვნიანის მომზადება-მირთმებით შემოიფარგლებოდა. გარკვეულ ეტაპზე აღმოვაჩინე, რომ სხვადასხვა სახის სალათების ფორმით მომზადებული ჭარხალი ძალიან არომატული, გემრიელი და ყველაფერთან ერთად სასარგებლოც შეიძლება იყოს.

უპირველეს ყოვლისა, ჭარხალი დაბალკალორიულ პროდქუტებში ლიდერია: 100 გრ. პროდუქტზე სულ რაღაც 35 კკალ. მოდის, საიდანაც 13 გრამი ნახშირწყლები, 4 გრამი კი უჯრედისია. ამას გარდა, ჭარხალი მდიდარია A, C და B6 ვიტამინებით, ფოლიუმის მჟავით, ლუტენით, რკინით, კალციუმით, კალიუმით, ფოსფორით და მაგნიუმით - საკმაოდ შთამბეჭდავი ჩამონათვალია. ამ ყველაფერთან ერთად, ჭარხალი ბეტაინს შეიცავს, რომელიც ღვიძლის დაავადებების განვითარების რისკს ამცირებს. აღმოვაჩინე, რომ ბეტაინი თავის სასარგებლო თვისებებს თერმული დამუშავებისასაც ინარჩუნებს - მაგალითად, ცხელ 'ბორშში".

ჯანსაღი ცხოვრების წესი ვისაც გაინტერესებთ და სხვადასხვა ტიპის დეტოქს-დიეტებს იცნობთ, ისიც გეცოდინებათ, რომ ჭარხალი ძალიან პოპულარულია სწორედ ასეთ სადეტოქსიკაციო დიეტებშიც, ვინაიდან ის კუჭ-ნაწლავის მუშაობას არეგულირებს და ღვიძლის გაწმენდაში გვეხმარება.

ფოლიუმის მჟავის მაღალი შემცველობის გამო, ჭარხალი ორსულების საკვების რაციონის მნიშვნელოვანი ნაწილიცაა.