შვრიის სასარგებლო თვისებები გახდომისთვის

მრავალი წელია, რაც შვრიის ფაფა ჩემი საუზმის განუყოფელი ნაწილია. რატომ? იმიტომ, რომ მას უამრავი სასარგებლო თვისება აქვს, მათ შორის, მას შლაკებისა და ტოქსინებისგან ორგანიზმის გაწმენდის და მისი საჭირო ვიტამინებით და მინერალებით მომარაგების უნარი აქვს. თუმცა, თუ გვსურს შვრიის ეს თვისებები სრულად შევირგოთ, ამისთვის დაუმუშავებელი მარცვლისგან უნდა მოვამზადოთ ფაფა, ვინაიდან მისი დამუშავებისას, ხდება გარსის და ჩანასახის მოცილება, რომლებიც ყველაზე დიდი რაოდენობით ვიტამინს და მინერალს შეიცავენ.

რატომ არის სასარგებლო შვრია დიეტის დროს - შვრიის ფაფა განტვირთვის დღეებისთვის ერთ-ერთი საუკეთესო საკვებია, ვინაიდან ის დიდი რაოდენობით სასარგებლო ნივთიერებებს შეიცავს, მათ შორის, А, С, Е, К, В ჯგუფის ვიტამინებს, ცილებს, სასარგებლო ცხიმებს, იოდს, რკინას, სელენს, ცინკს, კალიუმს, მაგნიუმს. ეს ყველაფერი კი იმას ნიშნავს, რომ დიეტის დროს ორგანიზმი საჭირო ნივთიერებების დეფიციტში არ აღმოჩნდება. 

ორგანიზმისთვის აუცილებელი ნივთიერებების ნაკლებობის გარდა, დიეტებს კიდევ ერთი უარყოფითი მხარე აქვთ: მუდმივი თუ არა, ხშირი შიმშილის გრძნობა. არაერთი დიეტაგამვლილი ადამიანი (მათ შორის თქვენი მონა-მორჩილი ანიკაც) აღნიშნავს, რომ თუ დიეტის პერიოდში ისინი შვრიის ფაფას მიირთმევდნენ, შიმშილი არ აწუხებდათ. მიზეზი გასაგებია: შვრია ნოყიერიცაა და სასარგებლოც. ასე რომ, თამამად შეიტანეთ ის თქვენი განტვირთვის დღეების საკვებ რაციონში.

ხშირად, ზედმეტი წონის დაგროვება კუჭ-ნაწლავის არასათანადო ფუნქციობირებით არის გამოწვეული. შვრია ასეთი შემთხვევებისთვისაც იდეალური პროდუქტია, ვინაიდან ის კუჭის და ნაწლავების მუშაობას არეგულირებს, სისხლში გლუკოზის დონეს ამცირებს და აუმჯობესებს ცხიმების ცვლის პროცესს.

ამას გარდა, ჭარბი წონა ორგანიზმში სითხის შეკავების გამოც ჩნდება. ამის შედეგად, არამხოლოდ არასასურველ წონას, არამედ შეშუპებულ ფეხებს, თვალის უპეების პრობლემებს და სხვა უსიამოვნო სიმპტომებსაც მივიღებთ. შვრიას კიდევ ერთი პლიუსი აქვს: ის ორგანიზმიდან სითხის გამოდევნის პროცესს აჩქარებს.