თმის გამოცოცხლება გაზაფხულზე

ჩემგან არ გესწავლებათ, თუ რა სახის სტრესის გაძლება უწევს ჩვენს თმებს ზამთრის განმავლობაში: ყინვა, ქარი, თოვლი. ეს ყველაფერი კი პოზიტიურად ნამდვილად არ აისახება თმის მდგომარეობაზე. ამიტომაცაა, რომ გაზაფხულზე, ისევე როგორც სახის კანს, თმებსაც გამოჯანსაღება და სიცოცხლისუნარიანობის დაბრუნება სჭირდება. ჰოდა, დღეს სწორედ იმ ნიღბებზე და მოვლის საშუალებებზე მოგიყვებით, რომლებიც ამ პროცესში გამოგვადგება.



Davines-ის ფირმის თმის ნიღაბი Nourishing Hair Building Pak მანდარინის და ილან-ილანგის ეთერზეთებზეა დამზადებული, დამატებით ყურძნის ფიტოაქტივს და კერატინს შეიცავს, რისი წყალობითაც თმის სტრუქტურის აღდგენის უნიკალური უნარი გააჩნია. სისტემატური გამოყენების შემთხვევაში კი დიდი ხნით შეგიძლიათ დაივიწყოთ გაყოფილი თმის ბოლოები. თბილისში ეს ნიღაბი არ შემხვედრია, მაგრამ წარმატებით იყიდება ონლაინ-მაღაზია Amazon.com-ზე და 30 დოლარი ღირს.



წინა პროდუქტთან შედარებით გაცილებით იაფი ღირს და საკმაოდ ეფექტურია John Frieda-ს აღმდგენი ნიღაბი Full Repair, რომელიც მასში შემავალი ომეგა-3-ის დახმარებით თმებს მთელ სიგრძეზე კვებავს და ამაგრებს. მისი რამდენჯერმე გამოყენების შედეგად თმები გაცილებით რბილი და დამჯერე ხდება. ამ ნიღაბის შეძენაც Amazon.com-ზე შეგიძლიათ ყველასათვის ხელმისაწვდომ ფასად.



თბილისში უკვე კარგად ცნობილი Rene Furterer-ის თმის მოვლის ხაზიდან გამოვყოფდი Carthame Gentle Hydro-Nutritive-ს მკვებავ ნიღაბს, რომელიც კარტამის ზეთს შეიცავს (სახელწოდებიდან მიხვდებოდით) და სკალპს კარგად კვებავს. ამას გარდა, ნიღაბში შედის თმის კერატინის აღმდგენი მიკროემულსიური ცვილი და ვიტამინი B5. ნიღაბი უნდა დავიტოვოთ 2-5 წუთი.



და ბოლოს, ლორეალის პრემიალური თმის მოვლის საშუალებების ხაზიდან არ მინდა გამომრჩეს ჩემი საყვარელი პროდუქტი: ნიღაბი Keratase Elixir Ultime, რომელიც მასში შემავალი ოთხი ზეთის წყალობით (სიმინდის მარცვლების, არგანის, კამელიის და pracaxi-ს ხის) იდეალურად კვებავს და აღადგენს თმის სტრუქტურას. სპეციალისტები ამ ნიღბის გამოყენებას კვირაში ერთხელ, 5-10 წუთის განმავლობაში გვირჩევენ.

მომდევნო პოსტამდე,

ანიკა