ვარჯიშები მუცლის ქვედა ნაწილის ცხიმის დასაწვავად

მუცლის ქვედა ზონა ჩემთვის ყოველთვის ყველაზე პრობლემური იყო - წონაში მატებისას სწორედ ამ ადგილას მეტყობა "შუფუმფულება", ზედმეტი ცხიმი და ცელულიტიც ყველაზე გემრიელად აქ ლაგდება ხოლმე. არადა, ზაფხულის მოახლოებასთან ერთად, როცა ჩვენი ჩაცმულობა თხელი და ჰაეროვანი ხდება, სულ უფრო ძლიერია სურვილი სხეულიც ამ ჰაეროვნებას შეესაბამებოდეს. გამოსავალი? დაბალანსებული კვება და კონკრეტულად ამ ზონაზე ორიენტირებული სავარჯიშოები, რომელთაც დღევანდელ პოსტში შემოგთავაზებთ.

ამ ვარჯიშების სერიის შესრულება კვირაში 3-4-ჯერ არის რეკომენდებული - ერთდღიანი დასვენება შუალედში აუცილებელია. თითო სახეობის დასრულების შემდეგ 45-60 წამი შეისვენეთ და შემდეგ გადადით მომდევნო სავარჯიშოზე.

სტატიკური პრესი 90 გრადუსზე - იდეალურია მთლიანად მუცლის ზონის გამოსაფხიზლებლად ვარჯიშის საწყის ეტაპზე. ვწვებით ზურგზე, როგორც ზემოთ ფოტოზეა მოცემული, ფეხებს ვხრით მუხლებში 90 გრადუსზე, ხელებს გავშლით და ხელისგულებით მივეყრდნობით ბარძაყებს. ღრმად ჩავისუნთქავთ და ამოსუნთქვისას მაქსიმალურად შევკუმშავთ მუცლის კუნთებს, ზურგი კი მყარად ეყრდნოება იატაკს და იმავდროულად ბარძაყებით ხელებს ვაწვებით (ფეხებს არ ვამოძრავებთ ამ დროს). ვასრულებთ 3 მისვლას, 10 გამეორებას.

პილატესით ინსპირირებული მოძრაობა პირველ სავარჯიშოს წააგავს - სტატიკური პრესის მსგავს ტექნიკას იყენებს მუცლის კუნთების ასამუშავებლად. ვწვებით ზურგზე, ორივე ფეხს ვხრით მუხლებში და მიგვაქვს გულმკერდთან. ხელებს თითებით ვაერთებთ ერთმანეთთან , მარცხენა ფეხს კი წინა მიმართულებით ვშლით ბოლომდე იატაკის პარალელურად. თავს და მხრებს ვწევთ იატაკიდან და ხელებით ვაწვებით ბარძაყს, იმავდროულად ხელებით ვეყრდნობით მარჯვენა ბარძაყს და მიგვაქვს ის გულმკერდის მიმართულებით. ვცვლით ფეხებს და იგივეს ვიმეორებთ მეორე მხარეს. ვასრულებთ 3 მისვლას, 10 გამეორებას.

ესეც პილატესის სუპერეფექტიანი მოძრაობაა, რომელიც აორმაგებს მუცლის პრესის სავარჯიშოების ეფექტს. ვქვებით ზურგზე, ხელებს გვერდებზე ვაწყობთ. ორივე ფეხს წინა მიმართულებით ვშლით და ჭერის მიმართულებით აგვაქვს, იმავდროულად მარჯვენა ფეხს ვაჯვარედინებთ მარცხენაზე, ფეხის წვერები წინ გაშვერილია. ვკუმშავთ მუცლის კუნთებს, ჩავისუნთქავთ და ფეხებს დაბლა დავწევთ დაახელოებით 45 გრადუსის ხაზამდე. ამოსუნთქვისას, ფეხებს ისევ ზედა მიმართულებით ავწევთ და იმავდროულად ავწევთ თეძოსაც და ზურგის ნაწილს იატაკიდან - ხელებს ბალანსის შესანარჩუნებლად ვიყენებთ. ერთი წამით ვჩერდებით, შემდეგ ისევ საწყის პოზიციაში ვბრუნდებით და ზურგს და ფეხებს პირველად მდგომარეობაში ვაბრუნებთ. ვასრულებთ 3 მისვლას, 10 გამეორებას.

ჯვარედინი "პლანკა" კალსიკური "პლანკას" პოზაში იწყება და იდეალურია დამატებით გვერდითა კუნთების გასავარჯიშებლად: ხელებით ვეყრდნობით იატაკს, ფეხები გასწორებული და ერთმანეთზე მიტყუპებულია. მარჯვენა ფეხს მუხლში ვხრით და მარცხენა მხარეს მიგვაქვს, მარცხენა ფეხს კი გვერდულად ვხრით ამ დროს. შემდეგ ვბრუნდებით ისევ "პლანკას" საწყის პოზიციაში და იგივეს ვიმეორებთ მეორე მხარეს.