ბლოგი:
მარტი 13, 2016
ავტორი Anika
მსოფლიო რბენა - ყველაზე მასშტაბური საქველმოქმედო ღონისძიება მსოფლიო სპორტის ისტორიაში 8 მაისს კახეთში, ლოპოტის გადასახვევიდან კავკასიონის ქედის გაყოლებით უკვე მესამედ გაიმართება. წყალი "ბაკურიანი" წელსაც ამ ღონისძიების ოფიციალური პარტნიორია, ასე რომ თუ თქვენ ამ რბენაში მონაწილეობის მიღებას აპირებთ, ადგილზე "ბაკურიანის" წყლის მიერ საგანგებოდ მოწყობილი ზონები არ გამოგრჩეთ: სირბილის დაწყებამდე ჩვენი ინსტრუქტორები გასახურებელი, ხოლო რბენის დასრულების შემდეგ კი გამაგრილებელი ე.წ. cool-down ვარჯიშების ჩატარებაში დაგეხმარებიან.
მსოფლიოს 32 მარათონის მონაწილე, სპორტული მედიცინისა და რეაბილიტაციის ცენტრის უფროსი, პროფესორი და მსოფლიო რბენის კეთილი ნების ელჩი, ბატონი დავით ტატიშვილი, დღევანდელ პოსტში რჩევებს გვიზიარებს შორ დისტანციაზე გარბენში მოსამზადებლად.
“მოსამზადებელ პერიოდში სასურველია 2-3 თვის განმავლობაში ინტენსიური ვარჯიში. რაც შეეხება უშუალოდ სირბილს, მოწოდებულია კვირაში 6 დღე დატვირთვა და 1 დღე დასვენება. იმის მიხედვით, სრული მარათონული დისტანცია გაქვს გასარბენი, თუ ნახევარმარათონი, ეს მანძილი დაფარულ უნდა იქნას მთელი კვირის განმავლობაში. გარბენის წინ 1 კვირით ადრე ყოველდღიურად უნდა შემცირდეს დატვირთვები, გარბენის წინა დღეს სირბილი არ არის რეკომენდებული და უნდა დავკმაყოფილდეთ გაწელვებით და სხვა სპეციალური ვარჯიშებით. ასევე, გარბენის წინ 3-4 დღე და განსაკუთრებით წინა დღეს კვების რაციონი უნდა იყოს დატვირთული ნახშირწყლების შემცველი საკვებით და სითხით. მთელ მსოფლიოში არსებობს წინა დღეს ე.წ. „პასტა ფართი“-ს მოწყობის ტრადიცია. ნებისმიერ შემთხვევაში, სასურველია ამ დღეების განმავლობაში, როგორც დიდი რაოდენობით მაკარონის, ასევე ნახშირწყლების შემცველი სხვადასხვა საკვების მიღება. “
აქვე გთავაზობთ დავით ტატიშვილის მიერ შემუშავებულ ნახშირწყლებით მდიდარ დღის კვების რაციონს, იმისათვის, რომ შორ დისტანციაზე გარბენს ორგანიზმი მომზადებული შეხვდეს.
საუზმე:
70 გრ. ფაფა (შვრია, ხორბალი)
200 მლ. გამოხდილი რძე
ნახევარი ვაშლი
½ ატმის წვენი ხილის ნაჭრებით
1 კოლოფი დაბალი ცხიმიანობის იოგურტი
1 ჭიქა ვაშლის წვენი
სადილი:
140 გრ. პასტა
100 გრ. ინდაურის გულმკერდის ხორცი გრილზე
150 გრ. ტომატიანი პასტის სოუსი
1 ჭიქა ვაშლის წვენი
1 მსხალი
ხემსი:
1 კოლოფი დაბალი ცხიმიანობის იოგურტი
1 ვაშლი
1 მუჭა თხილი
სადილი:
1 ლობიანი ღვეზელი
2 ნაჭერი ლავაში
40 გრ. დაბალი ცხიმიანობის გახეხილი ყველი
სალათის ფურცლები და პომიდორი
1 ჭიქა ფორთოხლის ახლადდაწურული წვენი
ენერგეტიკული ღირებულება: 2800 კკალ., 70% ნახშირწყალი, 15% პროტეინი, 15% ცხიმი.
მომდევნო პოსტამდე,
ანიკა